Приветствую Вас, Гость
Главная » 2019 » Февраль » 20 » Саха тыла - ийэ тыл
11:51
Саха тыла - ийэ тыл

Бүгүн, олунньу 19 күнүгэр "Саха тыла - ийэ тыл" декада чэрчитинэн лицей учууталларын икки ардыгар библиотека уонна саха кафедратын көҕүлээһининэн "Аман өс" куолуһуттар күрэхтэрэ ыытылынна. Күрэххэ учууталлар Егоров Е.Я (история) "Норуот күүһэ көмүөл күүһэ", Семенов А.А. – (омук тыла) "Тулалыыр эйгэ туһунан", Саввинова С.В. (обществознание) "Аныгы кэм сайдыылаах ыччата", Иванова К.В. (физика) "Ийэ айылҕам, балысхан сайдыы", Гуринова А.Г. - педагог организатор "Сахам сирин сайдар кэскилэ", психологтар Тимофеева Е.Д "Уу - олох төрдө", Иванова С.А "Төрөөбүт тылым киһи буолар төрдүм" уонна үөрэнээччилэр Алексеев Артур 8 а кыл. " Саха сахатынан кэрэ", Павлова Гералина 10 а кыл. "Таптал туһунан" тиэмэлэри сахалыы сайаҕас тылынан бэрт сэргэхтик, хомоҕойдук, бэйэ санаатын сааһылаан эттилэр, истээччи болҕомтотун тартылар. Егор Яковлевич өс хоһоонтон саҕалаан, сомоҕолоһуу күүһүн итэҕэтиилээхтик арыйда. Артем Александрович тулалыыр эйгэҕэ дьон сыһыаныгар тохтоото, София Валериановна сайдыылаах ыччат олоххо оруолун тоһоҕолоото, Айта Гаврильевна

Сахатын сиринэн киэн туттарын долгутуулаахтык кэпсээтэ, Елена Даниловна уу суолтатын толору арыйда, Саргылана Анатольевна төрөөбүт төрүт тыл норуот өлбөт-сүппэт барҕа баайа буоларын иэйиилээхтик эттэ-тыынна, Клара Владимировна төрөөбүт-үөскээбит Чуонатын иэдээниттэн эҥсэн, аныгы балысхан сайдыы ийэ айылҕаны алдьатар өрүттэрин бииртэн биир дакаастабыллары дьаарыстаан дириҥ ис хоһоонноохтук тиэмэтин арыйда, истээччини итэҕэттэ. Маҥнайгы холонуу диэтэххэ учууталлар бэйэ санаатын сайа этэргэ таһымнаахтара көһүннэ. Түмүк маннык буолла: 1 м - Иванова К.В., 2 м - Иванова С.А, 3 м - Павлова Гералина. Түмүк тахсар кэмигэр литературнай оонньууга көхтөөхтүк кытыннылар, алаадьылаах чэй иһэн, төрөөбүт тыл баай байҕалыгар тиксэн, омук быһыытынан туспабытын билиннилэр. Төрөөбүт тылбыт сүппэт дьылҕалаах буоларыгар бары үлэлиэҕиҥ! Кэлэн кыттыбыт дьоҥҥо барҕа махтал! Аны да кэлэн көхтөөхтүк кытта туруҥ, күндү доҕоттоор!

Мария Кондратьева

Просмотров: 21 | Добавил: flana9838 | Рейтинг: 0.0/0
Всего комментариев: 0
avatar